圖:James話唔似得舊年高永文操刀咁痛 /大公報記者何嘉駿攝
冬季係本港流感高峰期,衛生防護中心尋日就派人到立法會綜合大樓,幫立法會議員注射流感疫苗,反應何其熱烈,共有21位議員排隊打針,唔少人仲讚護士好手勢,好似無痛打針咁。經民聯林健鋒笑言「佢打咗(針)我都唔知」,新民黨田北辰(James)就話今年由護士出手,冇舊年由食物及衛生局局長高永文操刀咁痛。
姑娘笑Alice生仔咁叫
高局長尋日冇現身,但食衛局副局長陳肇始就有到場,睇住議員接種疫苗,其間仲會同佢哋傾嚇偈、拍嚇佢哋膊頭,睇嚟係想幫議員分散嚇注意力。不過,工聯會麥美娟(Alice)就面有難色,就算有陳副局企喺側邊安撫,佢都忍唔住大叫。Alice事後話,自己由細到大都好怕打針,仲話自己有次去醫院打針,連姑娘都笑佢明明只有一級痛,但就表現到生仔十級痛咁誇張。
男議員大多數都係着長袖恤衫,但係疫苗要打喺左手上臂,捲起衫袖又好麻煩,所以James同何君堯惟有除剩件白色底衫打針。雖然少咗份「英氣」,不過多咗份免疫力,都係值得嘅。
民建聯陳恒鑌(Ben)尋日就打咗自己人生第二支流感疫苗,佢話,依家流感惡菌好犀利,自己屋企「有大有細」,希望打完增強自身防禦力,仲話遲啲會帶埋屋企人打針添。
鄭晴