文｜鄭晴
民主黨黃碧雲（一舊雲）同啱啱退出公民黨嘅毛孟靜（毛姨姨），同樣喺九龍西競逐立法會議席，彼此早有牙齒印，兩人尋日又喺「民主派會議」嘅記招上爆出火花，真係花生味甚濃。
兩個女人為乜又唔啱Channel？咪係為咗青年新政囉。事緣有記者問佢哋，點解上次「青政」梁頌恆、游蕙禎被司法覆核唔搞大型集會，而家有另外四個人被挑戰就搞呢？
一向唔多like游蕙禎嘅一舊雲，梗係要即刻畫清界線啦。佢話梁、游同嗰四位議員唔同，兩人係未成功宣誓，又宣揚「港獨」、辱華同講粗口添。點知一舊雲一講完，之前曾經貼身護送游蕙禎闖入議會嘅毛姨姨，就即刻插嘴話，「黃碧雲嘅說話唔係代表我哋『民主派會議』」，又話所有司法覆核案嘅性質都一樣，就係當局要改變選舉結果。一舊雲就無再同毛姨姨拗，但佢面色係點，你懂的！其實，對住梁游負資產，反對派而家避都避唔切，標榜「本土」立場嘅毛姨姨仲要係咁攬住，唔知佢又係咪代表到「民主派會議」所有人呢？
