大公網11月30日訊 今個星期日就係民主黨換屆選舉，已經做咗四年主席嘅劉慧卿尋日表明無報名參選，而今屆只有胡志偉報名選主席，兩個副主席之位就有三個人競爭。對於呢個主席選舉，卿姐就話有少少失望，因為無人競爭，但係都會繼續舉行。胡志偉都五十幾歲，被問到是否有違年輕化嘅潮流，卿姐都依然好有火，話咩叫新一代，又話係咪年紀大就唔好，最重要就係領導層包括不同年齡，唔係年輕就代表所有嘅。
就嚟卸任主席，被問到有咩遺憾，卿姐就話始終睇唔到有普選，希望胡志偉喺下一屆繼續努力推動。跟住又話，民主黨總部翻新，都算係自己嘅功勞，希望日後可以多啲資源，可以有個大啲嘅總部。翻新總部都算自己功勞？真係笑而不語。但是講到普選，大家就記得，卿姐做立法會議員嗰陣，率領成個民主黨投反對票，否決政改方案通過，而家居然話遺憾睇唔到有普選，呢啲遺憾真係自己攞嚟喎！你哋投贊成票，全港市民咪出年可以普選特首囉！
