圖：市民爭住同CY合照，並為CY加油/ 大公報記者何嘉駿攝

　　尋日朝早雖然好清涼，但係鄭晴同過百個市民、遊客一早去咗禮賓府排隊，排乜？咪就係等參觀禮賓府囉！排頭位的市民原來九點前，已經嚟到禮賓府，平時禮賓府係香港政府舉辦重要活動嘅主要地方，難得開放，自然吸引市民嚟到參觀啦！

　　聽人講，特首梁振英（CY）喺每次開放日，都會出嚟同市民見下面、握下手，估唔到鄭晴都咁好彩，喺禮賓府行到十一點幾左右，攰攰地坐喺禮賓府外嘅噴水池旁，抬頭一望，見到CY同佢夫人梁唐青儀從禮賓府樓梯行落嚟，大批市民即時把握機會走近CY，爭住同佢自拍合照。眼見個個市民都同CY企到貼一貼，啲保安大哥都咪話唔嚇到標晒冷汗，CY反而臉帶微笑，仲喺花園行咗一個圈，極盡親民。

　　市民不停為佢加油

　　近期咁多「播獨」分子搞搞震，有市民趁機同CY打打氣，叫佢加油，又話希望佢可以連任，繼續造福社會咁話。而CY都好關心市民，見到市民就話「今日凍，大家保暖」。CY尋日好風趣，仲成為小朋友「湯丸」，時不時抱起小朋友一齊影相，氹得啲小朋友笑到甜一甜。CY又同其中一個小朋友嘅爸爸開玩笑，話個小朋友咁得意，不如生多個啦，即時引來全場大笑。鄭晴問咗其中一個畀CY抱起嘅徐小朋友，佢話自己雖然讀幼稚園，但大個都要好似CY咁叻，一樣做個成功的人，唔知呢個小朋友嘅志願係咪想做特首呢？

　　禮賓府尋日仲搵咗聖士提反女子中學嚟表演音樂，CY不忘走埋去同學生打氣。行得咁上下，啲保安大哥想帶CY離開，但係太多人想同CY影相，佢好有耐性咁留多一陣，開開心心同市民影下相、交流下，大概逗留咗二十分鐘先離開。

　　CY尋日傍晚喺Facebook上載多張相，表示：「今天禮賓府開放日順利完成，感謝各團體和政府同事幫手」，好warm，好多人畀like呢！