工業界（第二）立法會議員吳永嘉（Jimmy）不嬲都好貼地，除咗成日搭「叮叮」之外，原來都好鍾意搭巴士，貪巴士可以望風景發下白日夢咁話。話說尋日Jimmy就喺Facebook上載咗兩張自己搭巴士時嘅「Chok相」，除左「呻」下精彩議會生涯之外，仲一時感觸，話覺得而家爭擾不斷嘅立法會好似架巴士添！
Jimmy話，架巴士目的地係向社會整體利益出發，但就硬係有啲上錯車嘅乘客（議員），喺巴士上面大吵大鬧，要求司機轉目的地。Jimmy打趣咁話，「其實如果發覺搭錯車，最好即刻撳鐘落車啦」，因為好多乘客都想準時去到目的地，如果因為小部分人嘅「大龍鳳」令架巴士延誤就唔好啦！Jimmy呢番比喻就引起佢嘅多位朋友留言熱議。積金局主席黃友嘉（David）話：「其實如果有乘客鬧事，主席……oooops我意思係車長，可以請乘客落車，甚至報警。」餐飲聯業協會會長黃家和就再回應David話，「除咗車長可趕佢落車或報警（如果佢勝任的話），乘客都有權話事，如有鬧事者，乘客可制服佢，否則會車毀人亡。唔使等車長。」
