大公網11月15日 香港眾志秘書長黃之鋒，日前就飛咗去美國，又再繼續唱衰香港。佢就去咗紐約大學、哥倫比亞大學等出席講座。哥倫比亞大學政治學系教授及東亞研究專家黎安友（Andrew Nathan）就問黃之鋒，今次美國之行有咩目標，佢就話美國國會應該修訂現行法案去就着《香港人權及民主政策法》啟動立法程序，先可以令美國對港政策唔會局限於於經濟政策同產業貿易發展，亦都包括人權民主等核心價值嘅考慮因素。
教授就教路，除咗寄望國際社會關心之外，黃之鋒亦要提出實際建議先得喎。至於今日呢，黃之鋒就會去國會山莊參與美國國會及行政當局中國委員會嘅座談會，並跟國會議員開展游說工作。
身為一個中國人，或者土生土長香港人，居然勾結外國勢力，要求美國國會展開立法程序，除咗港奸之外，真係諗唔到有咩人會搵一啲外人干預香港嘅內部事務。人大又釋咗法，法院又有裁決，一切都有曬決定，黃之鋒仲要話游說美國國會議員，佢會有咩居心呢！大家心裏有數啦！
