梁頌恆、游蕙禎跑到台灣宣「獨」，台灣《蘋果日報》梗係要幫佢哋sell啦。《台蘋》仲寫到好危言聳聽咁，話游蕙禎稱，老一輩香港人會勸年輕人不要反抗、「中共會派坦克來壓你」，但台灣人不會，這是台灣比香港進步的地方。不過，《台蘋》喺介紹游蕙禎嘅時候就搞錯資料，話佢「今年參與立法會選舉，成為最年輕議員」。大家都記得，最年輕嘅議員係23歲嘅香港眾志羅冠聰，25歲嘅游蕙禎最多係「最年輕女議員」。不過，台灣媒體仲搞錯一樣嘢，梁游未過到宣誓嗰一關，佢哋仲係「候任議員」，唔係「議員」囉。
就算《台蘋》等媒體係咁吹捧梁游，台灣民眾似乎都好唔買帳。有喺台灣嘅朋友同鄭晴話，根本無乜人關注佢哋兩個嘅新聞。仲有網友喺《台蘋》段新聞片度留言，一針見血咁話：「他們倆在香港搞出一大堆問題，台灣政黨都避之則吉。他們應該在香港已沒立足之地，來台灣只是取暖吧？」
