圖：KK（左）扮起「健大夫」嗰陣一啲都唔怯場，仲針對打工仔嘅問題提出好多條藥方 網上圖片

　　工聯會黃國健（KK）早前化身「健大夫」，以短劇形式公布政綱，鄭晴都睇得津津有味。為免市民錯過，KK前日喺facebook上載返短片，畀市民重溫精彩演出。

　　或者KK有多年從政經驗，扮起「健大夫」嗰陣一啲都唔怯場，針對打工仔嘅問題，健大夫提出「標時神針」、「拔走對沖罐」、「本土綱目」、「防止工傷同貼」及「十成大保湯」等藥方，寓意就係勞工要有標準工時、取消強積金對沖、確保本地工人就業、改善工業安全，以及爭取全薪14周產假等勞工訴求。

　　短片長13分鐘，難得「健大夫」幾乎全程唔使點睇「貓紙」，台詞又順暢，真係令鄭晴刮目相看！

　　另外，工聯會另一位候選人郭偉強（阿強）前日喺facebook深情剖白，分享立法會工作嘅點滴。佢話，對於中西區嘅印象，最深就係立法會工作，當日由嫻姐助理，轉到議會工作。究竟有咩分別呢？ 阿強就話，中西區食飯好鬼貴，但最大分別就係由同街坊接觸到日日睇政策文件。每一份政策文件，都係改善打工仔生活嘅機會，一紙文件猶如千斤重擔。希望來屆繼續為市民服務。鄭晴相信，工聯會嘅努力係會得到回報，市民眼睛都係雪亮。

　　參選九龍東嘅仲有：柯創盛、謝偉俊、譚文豪、胡志偉、陳澤滔、胡穗珊、譚香文、譚得志、黃洋達、高達斌，呂永基。

　　參選港島區嘅仲有：張國鈞、葉劉淑儀、許智峯、陳淑莊、鄭錦滿、羅冠聰、司馬文、王維基、沈志超、詹培忠、徐子見、何秀蘭、劉嘉鴻、黃梓謙。