圖：Judy話香港好多孕婦都會繼續返工，派傳單當然無問題

　　新民黨主席兼立法會選舉港島區候選人葉劉淑儀（葉太）的參選名單充滿「生氣」，年輕的團隊中仲有兩位準媽媽陳家珮（Judy）及王政芝。早幾日葉太出席唔到選舉論壇，公民黨候選人陳淑莊（Tanya）即刻喺facebook揶揄，話「好睇唔過眼」，批評葉太唔應該將咁刺激嘅活動推畀兩位孕婦，要佢哋兩個自己出席論壇。

　　排喺名單第二嘅Judy尋日就喺facebook回應，話大肚婆唔單止可以去論壇，仲一樣可以喺雨中派傳單添！嘩嘩嘩！落雨仲派傳單？鄭晴有啲擔心噃。不過放心，Judy當然唔係淋住雨派啦！

　　Judy又話，正所謂佢有佢派，我有我派，唔明點解要歧視孕婦，而香港本身好多孕婦都會繼續返工，尤其係服務行業，隨時每日要企八、九個鐘。Judy仲奉勸，叫Tanya唔好咁離地喎！尋日喺海怡派傳單嗰陣，仲見到Tanya都喺度派傳單添！葉太喺facebook都有轉貼Judy嘅帖子，仲讚Judy一直以來都努力工作，又用心備戰選舉論壇，叫大家唔好忽視佢嘅努力。Judy同葉太嘅努力，鄭晴同大家都有眼睇，可能Tanya做慣棟篤笑，慣咗咩事都「抽下水」啦！

　　參選港島區仲有：張國鈞、郭偉強、許智峯、鄭錦滿、羅冠聰、司馬文、王維基、沈志超、詹培忠、徐子見，何秀蘭、劉嘉鴻，黃梓謙 。