發展局局長陳茂波同民政事務局局長劉江華，尋日下午同候任鄉議局界別議員、鄉議局主席劉業強見面。鄭晴打聽到，劉業強喺會上為眾多新界原居民嘅權利發聲，例如針對丁權「有丁無地」嘅問題，佢就建議政府以貸款方式資助原居民買地起屋，不過呢個建議只係初步構想，未涉及具體嘅做法，大家會喺九月嘅常設小組會議上繼續討論。
發展鄉郊旅遊亦係鄉民非常關心嘅議題，劉業強又建議同民政局合作，喺偏遠鄉郊發展民宿，例如沙頭角荔枝窩，就係一個好好嘅示範地區，聽聞民政事務局反應都幾正面，希望好快有好消息啦。鄭晴發現，劉業強應該係第一位候任新科議員同政府官員會面，仲要一日內見咗兩位局長添，足見政府非常重視同鄉議局嘅合作。
