圖：周浩鼎邊跑邊講政綱
已參選超級區議會嘅民建聯副主席周浩鼎（Holden）尋日喺佢嘅社交網站上，就有一段以佢為主角嘅短片。喺短片中，Holden身穿Polo恤、運動褲，慢慢咁喺條街上跑，其間仲從一啲市民過嘅日常生活，發表咗佢對香港政策嘅願望同建議添。
Holden喺短片中，先見到一位正在送囝囝返學嘅爸爸，Holden就話，有時間梗係想陪下屋企人，工作搏命都只係為咗下一代啫。之後Holden就見到一個笑到矇曬眼嘅一家四口家庭，Holden就話，同性婚姻會破壞傳統家庭價值，唔知下一代點算喎。跟住Holden又跑過啲本地小店，話港人以前會喺小店買嘢，但依家嘅壟斷令港人冇曬選擇。最後Holden就話一定要為香港做返啲嘢喇。鄭晴覺得呢段短片真係幾好睇㗎，不過，對於Holden套衫喇喎，鄭晴覺得唔係太襯囉，同埋佢嗰種慢跑，似競步多啲囉。
