圖：興哥即場讀咗四次「剪布秘笈」/大公報記者麥潤田攝

　　立法會尋日舉行本屆會期最後一次大會，面對反對派「拉布」，立法會可唔可以喺聽日會期完結之前，處理晒剩低嘅三項法案都係未知之數。一向怒斥「拉布」歪風嘅工聯會王國興（興哥）同鄭晴講，今屆立法會就快完結，就好似學生畢業咁，但各位議員要真正畢業，就需要通過晒三條法案先得。佢仲即場讀咗四次 「剪布秘笈」─ 「得正正喺度，坐定定喺度，乜都唔使做」，話如果各黨派議員都關顧民生，就應該做到 「剪布秘笈」所講，留守議會。

　　興哥尋日帶咗佢嘅招牌道具 「金鉸剪」同埋一個新「隊友」返嚟立法會抗「拉布」。呢位真係名副其實的 「豬隊友」嚟架，因為佢係一個豬公仔。興哥仲不停以 「麥兜」、「麥兜」咁稱呼佢，事後仲喺Facebook上載咗自己同 「麥兜」及 「金鉸剪」嘅合照。不過，由細睇《春田花花幼稚園》大嘅鄭晴就發現，其實興哥手上嗰隻公仔，係麥兜表弟麥嘜，麥兜嘅右眼係有深色胎記嘅。而興哥亦都好快發現自己認錯 「隊友」，亦都急急發帖致歉：「麥嘜豬我認錯咗你係麥兜㖭，仲要你陪我坐定定喺度，應該要認真道歉：真係唔好意思！」興哥唔使唔好意思啊，唔坐定定喺度開會嘅議員先應該say sorry囉。