選管會早前敲定咗，出年3月11日就港島、九西和新東議席，同建築、測量、都市規劃及園境界議席補選。反對派內部雖然爭崩頭，但佢哋早前就協調好，話會優先讓路畀DQ四人參與補選，所以已上訴嘅劉小麗好有可能會突然擱置上訴參選。可能因「泛民」當佢無到而心有不甘，青年新政游蕙禎尋日就喺私人Facebook放話，話今次要填補嘅九西議席本身係佢擁有，所以根據 反對派嘅協調原則，小麗好應該讓路畀「青政」出選。
未到提名期已鬼打鬼
游蕙禎話：「我相信我哋呢邊有人出選的時候，根據今次補選原則，小麗老師都一定會深明大義大局為重讓路嘅。大家話係咪？」而呢番說話亦引起支持者回響，話等「青政」推人出選雲雲，亦有網民譏諷小麗太貪錢，唔會放棄補選。至於到底會唔會派人，游蕙禎就賣關子留言話「好快會知」喎。
有時真係忍唔住笑，反對派一直要挾政府，話要修補撕裂就唔准合併補選，但轉個頭又可以為咗參與第一輪補選擱置上訴喎？鄭晴唔知反對派為修補撕裂做過啲咩，但知道小麗老師要補選，可能要問過游蕙禎准唔准先啦！
