圖：熱心人見小野豬暈低幫牠淋水降溫/網上圖片
近排天氣熱辣辣，西貢有BB野豬都頂唔順，差啲中暑啊，好彩有暖男經過見到，畀水佢飲，幫佢遮太陽，否則就陰功豬囉！
網上前日出咗文，話當日有人喺西貢發現一隻孤零零小野豬，行行下暈咗，疑似中暑，佢即刻畀水BB豬飲，BB豬無耐真係行得返，事後呢名暖男仲繼續留低，照顧咗BB豬一陣。
事件喺網上引起熱烈討論，唔少網民大讚呢位暖男有愛心，非常欣賞佢嘅行動。不過，都有網民問，點解唔報警或者call漁護署呢？
呢位暖男尋日回應話，「地球係共同擁有，大家有大家嘅生活，見到佢（BB豬）咁唔舒服，咁咪盡人事幫到就幫，做到可以做嘅嘢，試圖救野豬，都盡量唔想影響佢原有生活。」
