唏呀唏呀唏！唏呀唏呀唏！突然咁好節拍，都係因為畀嗇色園搞嘅普道文化同樂日「共賞躍動的文化──舞獅」感染。
嗇色園黃大仙祠尋日首次舉行「普道文化同樂日」，特別以舞獅做主題，等善信有機會了解下每個文化背後意義。同樂日由淺入深介紹舞獅歷史同特點，包括圖文並茂嘅文化展覽介紹舞獅起源、仲有「南獅」同「北獅」獨特之處。
善信仲可以一嘗舞獅躍動之樂趣，參加兩場「舞獅體驗工作坊」，由專人從旁指導如何舞動獅頭，感受躍動文化的魅力，真係想問句「你有free style嗎？」同日仲有兩場舞獅表演，神態多變嘅舞獅走遍黃大仙祠，為大家送上祝福，非常熱鬧。
大會仲安排拍照區放置獅頭畀善信selfie，如果市民分享照片再加「#普道文化同樂日」，就可以自動參與活動嘅攝影比賽，三位優勝者仲可以獲得「黃大仙師聖像水晶擺設」！
