近排天氣熱，不如出海消消暑！有船務公司由今日起一連三日，免費畀市民全日任搭兩條航線，分別係西灣河來往鯉魚門三家村及西灣河來往觀塘航線。市民可乘坐有懷舊裝飾嘅木製小輪，沿途欣賞一望無際的海港景色。
今次活動係由珊瑚海船務有限公司舉辦，船公司仲好有心思，將兩條航線嘅兩艘輪船重新裝飾，市民遊船河就好似穿越時空咁，返到去老香港，其中一艘嘅船身有香港霓虹燈招牌做裝飾，上層船艙就布置成舊式茶樓，而下層船艙就模仿七十至八十年代嘅劏房環境，另一艘船就以舊式漁船為主題。船公司預計，活動會吸引逾萬名市民乘搭。
西灣河來往觀塘航線，由西灣河碼頭開出航班，頭班船喺早上7時03分開出、尾班船晚上9時33分、而由觀塘開出航班，頭班船喺早上6時48分開出，尾班船係晚上9時18分，船程約15分鐘。
