大公網12月11日訊 正當青年新政梁頌恆同游蕙禎因為宣誓風波而搞到冇得做立法會議員，搞到連本土派支持者都唾棄佢哋嘅時候，本土民主前線發言人黃台仰就依然死心不息，繼續走去台灣播「獨」，仲口出狂言話，希望台灣成功獨立之後，唔好忘記包括香港在內嘅一啲地區喎，擺到明係想「台獨」勢力照顧「港獨」分子。
黃台仰尋日響台灣出席「世界人權日嘉年華」嗰陣就聲稱，依家嘅香港人全部都唔可以叫做「人」，只係「奴隸」，因為冇自由、冇思考，只有「香港獨立」先可以令香港市民真正做返個人喎，真係鬼話連篇。
其實，經過宣誓風波之後，本土派已經淪為過街老鼠，人人喊打，就連「港獨先鋒」、另一位本土民主前線發言人梁天琦都自認好廢、好無能，仲話要走去外國讀書，好似唔想再搞事咁，唔該你黃台仰就唔好再繼續瘋言瘋語啦。
