早陣子美股出現單日轉向，搞得氣氛隨即轉弱，猶幸是公司業績達標、大體上符合市場預期，才在今星期恢復部分失地。有分析員就話，美股高位調整僅兩個巴仙，即見買勢湧現，可見投資者購買力仍然強勁。但筆者所見，今星期升市，但成交卻一直收縮，「購買力強勁」一說，難免牽強。美國首季經濟增長轉差，斷估今年全年業績的同比表現都難以樂觀，美企第一季業績合格，很可能是水尾，後勁不繼的機會頗大。
單日轉向的又何止美股，昨日騰訊早上急升至239.6元高位後，便無以為繼，下晝多跌1.2%，收市則微跌。類似情況近的在2月23日出現過，其後短線回調5%。最近分析員都睇騰訊目標價起碼260蚊，筆者不是專包拗頸要睇淡，但經驗告訴我，市場目前是睇得太好。
