圖：筲箕灣耀東邨對開路邊一隻小野豬頭部被困在鐵欄之間，動彈不得\電視圖片
又有野豬出城搵食，仲係三小時內喺香港仔同筲箕灣分頭搵食！
先講香港仔嗰單，尋日凌晨零時許，野豬家族兩大拖五小，一家七口拉大隊落山，去到黃竹坑塘邊徑同葉興街之間，有途人發現即刻報警。警察叔叔好快嚟到，離遠監察，只見豬媽媽沿途撞翻垃圾桶，同行的五隻小野豬即衝前搶食，不過冇對人構成危險，大約一小時後，野豬家族食飽飽返上山，警察都收隊離場。
到凌晨三點幾，筲箕灣耀興道耀東邨對開，又有人發現一隻長約一米嘅小野豬，佢就「陰功豬」咯，頭部被夾喺行人路鐵欄罅隙，小野豬不斷掙扎，條頸受傷流血。警員及漁護署人員接報好快到場，但係都幫唔到野豬解困，於是通知消防員嚟，先用毛氈包住野豬，再用油壓工具唧開鐵枝，成功救出，小野豬被趕入鐵籠，由漁護署人員帶走，交畀獸醫治理傷勢。
講開又講，香港仔出沒嘅野豬家族，喺上月九日凌晨零時，已經去過黃竹坑道65號對開山邊搵食，當時都係野豬爸媽帶隊，睇嚟佢哋係「地頭豬」。
