圖：「波子」為安達邨藥房的貓店長

　　「喵星人」賣萌耍家，自必然虜獲唔少粉絲，成為商舖生招牌。觀塘安達邨有間藥房嘅貓店長「波子」，日前疑抓傷顧客，被漁護署「預約拘捕」，搞到貓主個心囉囉攣之餘，仲掀起全城關注。幸好，鄭晴尋日打聽到「喜訊」，民建聯立法會議員劉國勳聯繫漁護署下，成功爭取撤銷拘捕，一天都光曬！

　　事緣日前有位媽咪帶同五歲囝囝幫襯藥房，點知隔咗陣就返轉頭，投訴囝囝畀「波子」抓傷耳背。藥房老闆雖然願意承擔醫藥費，但媽咪堅持報警，仲向漁護署投訴，搞到同囝囝同齡嘅「波子」差啲要被捕。雖然漁護署前日無到場「拘捕」，但由於貓主事發後已唔敢留「波子」喺舖面，搞到「波子」「有舖歸不得」下情緒低落，唔肯食嘢又嘔吐，結果要送去獸醫診所留醫觀察。

　　劉國勳積極跟進現轉機

　　鄭晴聽劉國勳講，佢尋日同漁護署署長梁肇輝等官員跟進事件，署方已經酌情批准「波子」因應身體不適，而留喺私家獸醫診所治療，並同時進行針對狂犬病嘅隔離觀察，為期七日。換言之，「波子」只要驗唔到有狂犬病、又恢復健康，最快可以喺後日出院，重回藥房「打躉」，同街坊Say Hi嘞！

　　劉國勳認為署方亦應從中取經，不要單聽片面之詞就「拘捕」，署方亦已承諾會檢視。