六人被DQ，喪失議員資格，其中四個議席會喺明年3月11日補選，呢四個議席，有三席都係地區直選，包括港島、九龍西同埋新界東。被DQ嘅劉小麗同梁國雄都表明有意補選，不過喺舊年立法會選舉落敗嘅新同盟范國威就唔係咁睇啦！
佢話，梁劉而家提出上訴，係有官司在身，一旦參選，公眾就會質疑佢兩個係咪嚴肅對待上訴，一旦參選而又當選，加埋上訴得直，咁就出現一人佔兩席。
范國威又話，出年補選係填補青年新政梁頌恆同游蕙禎嘅議席出缺，而「泛民」共識係「青政」先有優先權，唔係梁劉喎。所以應該要透過初選先。萬一真係出現上訴得直同埋梁劉補選勝出嘅情況，都真係唔知點，不過范國威被問到係咪為選舉鋪路，佢就話只係就原則問題提意見，建制派已經開始緊，「泛民」應該盡早完成協調喎！范國威無端端講呢啲嘢，司馬昭之心，路人皆知啦！正如網民話齋，使唔使設立一個新東「關愛座」呢？
