大公網訊 (記者龔學鳴報道) 公民黨譚文豪尋日喺facebook發帖，話自己「實測」由福田去到廣州東站，一共用咗1小時50分鐘。佢仲話，而家高鐵只去到廣州南站，唔多方便，港人最常去嘅係廣州東喎！政府新聞網亦都透過facebook回應。
運房局話，假設旅客目的地係北京路步行街同中山路交界，最近嘅地鐵站係公園前站。如果坐直通車，由紅磡坐到廣州東，之後轉地鐵到公園前站，一共要134分鐘。但係如果坐高鐵，由西九龍總站坐到廣州南，之後轉地鐵，只係要77分鐘，而兩者都無計通關時間。所以坐高鐵都係快過直通車一個鐘左右。
唔知譚文豪係咪做飛機師太耐，唔係點識搭車，搞到所謂「實測」結果都係比較離地。政府新聞網發帖，市民就睇得一清二楚啦！
