圖：《建軍大業》製作嚴謹，爆破場面好睇，市民網民個個勁讚

　　為中國人民解放軍建軍90周年獻禮嘅電影《建軍大業》，前日開始喺香港上映，全城熱爆。經民聯前排就喺港澳兩地舉行咗首映禮，好多政商界、電影業界朋友都有捧場，非常成功。經民聯監事會主席、寰亞電影老闆林建岳尋日就撰文，大讚《建軍大業》製作非常嚴謹，落咗唔少工夫還原歷史，戲中好多爆破場面，都係真正嘅爆破，無後期電腦特效加工，可觀性非常高，佢睇過好幾次，仍覺蕩氣迴腸。

　　兩地合拍片水準高

　　林建岳又話，呢部咁大製作嘅電影由香港導演劉偉強執導，絕對係香港人嘅驕傲，仲係兩地電影業界合作，共同發展更大華語電影市場嘅又一例證。經民聯亦透過首映禮作籌款活動，經民聯主席盧偉國同鄭晴講，今次籌款成績理想，又稱讚呢部兩地合拍片水準很高，預期會取得完美成績。

　　經民聯副主席林健鋒就話，《建軍大業》嘅上映好有意義，可讓市民重溫歷史，令年輕一代感受家國情懐，入面有很多發人深省嘅地方，激盪人心，希望年輕人學習前輩嘅熱血與激情，有自律同奮鬥精神，了解富國強兵嘅重要性。

　　經民聯寰亞向本報讀者送飛

　　經民聯同寰亞電影仲提供咗換票證畀《大公報》嘅熱心讀者，想入戲院感受下熱血與激情嘅朋友，千萬不要錯過機會，記得留返今日《大公報》頭版嘅印花，致電本報總機25757181攞飛啦！