圖：今日係回歸二十周年大日子，去年煙花璀璨，今年將更靚更好睇
七一回歸紀念大日子，真可謂區區都精彩，慶祝活動多到數唔曬，除咗維港煙花匯演，仲有勁多嘉年華、展覽活動，相信大家一定有啱心水嘅好去處！鄭晴覺得，尖沙咀可以玩足全日，例如海港城海運碼頭，有首次訪港嘅大連海事大學實習船「育鯤」停泊，大家畀十蚊就可以登船參觀，深入了解呢艘世界上現時最先進嘅專用遠洋實習船。
夜幕降臨，就可以喺星光大道、尖沙咀海濱花園欣賞煙花匯演。今次匯演有近四萬枚煙花彈，由五艘躉船發放，配以光影聲樂效果，歷時23分鐘，港島會展中心玻璃幕牆以LED投射動畫、蝴蝶飛舞圖像。唔好以為睇完煙花就結束，國際著名鋼琴家李雲迪會喺結束前有激情演出，相信一定掀起全晚高潮！
所謂馬照跑，舞照跳，七一又點少得回歸賽馬呢！今日沙田馬場嘅香港共慶回歸賽馬日，有多項助興節目，剛獲政府宣布頒發銅紫荊星章嘅「四眼Cue后」吳安儀，會同其他星級運動員亮相。
留意交通封路改道
全日活動花多眼亂，鄭晴提提你，記得留意交通安排。為配合煙花匯演，港島灣仔、中區、山頂區部分道路以及介乎維園道與民康街之間嘅東區走廊（西行），今晚七點起分階段封路改道；九龍區尖沙咀、佐敦一帶就由傍晚六點起分階段封路改道，港鐵會加強服務，電車如有需要會加強班次。維港今晚有封港措施，天星小輪尖沙咀往來中環、灣仔嘅兩條航線，傍晚六點十五分至九點十五分暫停服務，新渡輪往來長洲、梅窩嘅兩條航線，北角往來九龍城、紅磡嘅兩條航線，傍晚六點半後有多班航班取消。中環至半山自動扶梯系統，就延長服務時間至七月二日凌晨兩點。
