民陣尋日煞有介事咁話，收到康文署電話通知，話今年七一遊行唔可以喺維園出發。民陣召集人區諾軒引述康文署聲稱，根據內部指引，視乎申請團體性質決定優先租用次序，而今次場地會優先租予各界慶典委員會用作慶祝回歸活動用途。佢仲話，由03年開始都喺維園做起點，過往建制派都係申請上午，而家下午都申請埋，話相當離譜，又話政府今次係要為回歸20周年洗太平地喎。
Book唔到場就話洗太平地，民陣你係咪當咗維園是私家場啊！慶委會執行主席鄭耀棠就話，維園係一個舉行大型活動合適場地，可以畀市民廣泛參與，該會過往都借用維園搞回歸活動，今年都有向政府申請，舉辦「創科驅動 成就夢想」為題嘅活動，稍後就會開記招交代一系列活動啦！
立法會民政事務委員會副主席吳永嘉就話，相信預訂場地嘅原則係先到先得，來自廠商會嘅吳永嘉就以工展會為例，話廠商會每年都喺維園搞工展會，一樣無優先權，只可以盡早預訂，所以每年開幕日子都唔同。只要按足程序訂場兼且無出錯嘅話，就唔可以講話係政治原因喎！聽到未呀？
