【大公報訊】記者林志光報道：在政府重手辣招稅下，不少投資老手亦要扮係上車首置客，用嚟買樓避稅。其中長實（01113）賣樓大旗手趙國雄上月便以首置客身份，斥近億元購入一個中半山雅賓利大廈豪宅單位，但尋日北角維港頌開價後，佢即時笑住話後悔買早咗，惟有用「早買早賺」、同諗住買間維港頌單位嚟安慰下自己咁話喎。
長實尋日公布維港頌首批開價，最貴可以望維港海景的20樓四房單位，折實呎價都只係四萬蚊多少少，仲平過趙國雄所買嘅雅賓利單位，趙國雄即刻呻笨，話早之遲少少至入市，咁咪可以用平啲價錢，但就買到個高一層兼望維港景大單位囉，仲笑住話考慮撻咗個單位。
不過，佢隨後都話，自己今次入市，都係睇好本港經濟同樓市，而成日講嘅加息問題，已經係好out咁話。同埋最近個市咁旺，都可以話係早買早賺。為咗令自己心裏感覺好受，可能會買個維港頌單位當安慰下自己。至於今次以首置客名義入市，都係好似其他普通香港市民一樣，享受番應有權利啫，佢又笑稱，今次幾十歲人先用首置名義入市，份工更加重要，要更加努力工作，賺錢供樓。又話唔方便透露究竟買樓嚟收租定係自住，因為隨時影響佢向銀行申請做按揭可以攞到嘅成數喎。
趙國雄上月斥9430萬元買咗雅賓利大廈19樓C室及以250萬元買入一個車位，單位實用面積1948方呎，呎價超過4.8萬元。以首置名義買樓，慳稅超過千萬元。
