大公網4月3日訊（記者龔學鳴）候任行政長官林鄭月娥日前話，希望下屆政府班子至少有三名女性做問責官員，全國政協委員、文化界選委汪明荃（阿姐）就睇好民政事務局副局長許曉暉。汪阿姐早上出席商台節目個陣，大讚許曉暉有能力、態度友善、容易溝通，係唔錯嘅官員。佢又話，民政事務局管理範疇太多，建議下屆政府另組文化局嚟處理文化政策。
被問到希望西九興建一個大型表演中心抑或係故宮文化博物館，汪阿姐毫不猶豫咁選擇咗後者，理由係香港已有一定嘅表演場地，而「博物館就係缺乏嘅」。佢又話，香港一直標榜為國際文化都會，但就無一個文化嘅博物館，反對興建博物館嘅人係「唔了解博物館對香港嘅重要性」。
