圖：林鄭憑777票大熱當選，網民熱烈祝賀之餘，又封林鄭做「香港人嘅Jackpot」 大公報記者林少權攝
行政長官選舉結果尋日出爐，林鄭月娥（Carrie）憑777票，大熱當選成為香港首位女特首人選，票數大幅拋離其餘兩位候選人足足成條街。回顧呢次參選經歷，Carrie可謂「明知山有虎，偏向虎山行」，難怪有網民形容佢同老虎搏鬥，就好似賭場玩緊老虎機，「777」就等同中咗Jackpot，贏得精彩！
數字暗藏玄機，信則有，不信則無。「777」冧巴唔單止順，普遍認為係Lucky number（幸運號碼）。話說英國數學家Alex Bellos幾年前搵咗幾萬人做研究，發現「7」係最受歡迎嘅冧巴。呢次選舉無獨有偶出現「777」，難怪有網民即刻封Carrie做「香港人嘅Jackpot」。
至於其餘兩位候選人曾俊華同胡國興，分別拎到365票同21票。有網民就講笑話：「曾生一年hea足365日，所以有365票；胡官就揸Blackjack（廿一點），以為大曬，但佢唔知大家玩緊『三公』」。亦都有網民話：「不管三七二十一，我們（香港人）都要過好一年的365日！」
網民係有創意嘅！
