港鐵公司新一輯宣傳片呼籲乘客搭車時除低背囊，話最怕碰上「孭嘢人」描述孭背囊乘客撞到旁邊人，點知爆出「關公災難」，網民劣評如潮，不滿港鐵專登針對背包客。
港鐵CEO梁國權就話片段係想鼓勵乘客將背囊擺喺地下，「希望大家包容嚇喇」。「窮富翁」、飲食業集團老闆黃傑龍尋日就喺佢個Facebook專頁發帖話，佢唔評論港鐵表達手法，只講孭背囊禮儀，佢喺澳洲讀中學時，學生手冊有兩樣嘢用到今日，其中一樣就係「背囊Off shoulder！」即係去到人多的地方，唔好繼續孭住。佢話呢樣嘢，香港啲學校真係冇教，算係文化差異。
鄭晴覺得，有啲網民反應可能過大，不過，港鐵敏感度亦都係一路唔夠，高鐵事件、年年加價，大型樂器登記、加設關愛座、縱火案傳媒採訪安排都動輒得咎，公關團隊真係要認真反省嚇。
