新春佳節，工業界立法會議員吳永嘉（Jimmy）（圓圖）尋日舉行新春團拜，同傳媒一齊共晉午餐。熱愛打羽毛球嘅Jimmy，趁之前幾日農曆新年假期忙裏偷閒，約咗朋友打波，相當滿足。佢仲透露，自己早於80年代，已經有同前香港羽毛球隊成員陳念慈切磋過球技添。話時話，身為體育界選委嘅陳念慈，最近做咗林鄭月娥嘅競選辦副主任，睇嚟呢排都冇乜時間拎返起塊球拍住囉。
Jimmy唔單止球技了得，求學時期仲「彈得唱得」。Jimmy話，自小已經學鋼琴，11歲喺香港大會堂參加鋼琴獨奏比賽贏到冠軍。升讀香港大學後，Jimmy參加校內一個歌唱比賽，獲得當時擔任評判嘅寶麗金唱片公司高層邀請去試音添。
其實，經民聯主席盧偉國一樣識得演奏樂器，曾經喺立法會議員記者同樂日表演吹色士風，又大展歌喉。Jimmy可以考慮搵埋盧偉國一齊夾Band唱歌。
