傳統雖然有話「過冬唔凍過年凍、過冬凍過年唔凍」，但香港「這個冬天不太冷」，天文台最新數據顯示，今年一月平均氣溫高達18.5℃，打破1901年18.3℃紀錄，成為天文台有紀錄以來最暖嘅一月。難怪鄭晴呢幾日出外拜年利是，都係着件短袖衫示人。試問衣櫃入面件靚靚大褸，幾時先可以着出街？
根據天文台香港氣候摘錄顯示，今年一月平均氣溫為18.5℃，而平均最高氣溫及最低氣溫分別為20.6℃至17℃。其中，一月八日仲錄得單月最高氣溫25.5℃。
天文台總學術主任岑富祥同鄭晴講，上月華南地區嘅東北季候風風勢較弱，加上無顯著嘅寒潮影響香港，而全球暖化同時提供有利條件，搞到本港冬季嘅整體溫度有上升趨勢。
唔想以後香港無冬天，鄭晴不厭其煩，忠告各位愛惜地球，新一年起，盡量減少浪費！
