圖：波哥曬佢二十歲嘅靚仔相/網上截圖
保險界立法會議員陳健波（波哥）係今屆立法會開始先開設Facebook帳戶，但就十分活躍，唔單止教後生仔投資理財，最近仲教埋健康養生。佢前日上載一條短片力讚杞子明目功效顯著，話自己二十幾歲仔就已經有八百度近視，但近幾十年日日對着電腦工作，眼睛都無大問題，原因就係每日都飲杞子水。波哥仲附上自己仲係波仔嗰陣，二十歲嘅青澀相為證。
波哥當然亦都即場傳授咗四十幾年嘅明目經驗，就係每日準備約20粒杞子，沖洗乾淨，之後放入保溫瓶用熱水焗10個鐘，令杞子完全發揮出功效，最後連渣食埋，就可以做到清肝明目。鄭晴視力麻麻，今日都準備返去試一試啊。
