立法會今朝復會，辯論教育界葉建源提出「下任教育局局長須具備的條件」議案。原議案的內文七行文字，有四行半都係鬧緊教育局局長吳克儉，後面先娓娓道來所謂嘅條件。
民建聯張國鈞（Horace）就睇唔過眼，反對派呢個議案根本就係針對人多過提要求，所以動議修正案，將鬧爆局長嘅句語刪除，但都保留咗餘下兩行多少少嘅「條件」，亦無加入什麼政治元素，原議案亦都因此變得名副其實啦。
點知Horace嘅修正案通過咗，令原議案無得鬧人之後，反對派竟然喺最後投票全部投曬反對票，將葉建源本來對下任教育局局長條件嘅要求都否定埋！
Horace之後就喺社交網站同大家分享「議事規則」小知識：「世界就是這樣諷刺！由於我提出修訂葉建源原議案的修正案獲得通過，因此其後葉建源的原議案必須通過，我對他的修正議案才有意思。結果是我和建制派各同事在表決時全力支持葉建源的原議案，而葉建源和反對派則全力反對葉建源的原議案。大家聽得是否有點精神分裂呢！？」
坦白講，今日呢件事就係反對派成日為反而反嘅最佳例證，無得鬧人就連原議案真正有建設性嘅部分都唔要，到底當初動議嘅原因係咩？大家心照不宣啦。
