圖：豪哥與妻子成為兩地夫妻，同時也是一起經營青旅的夥伴
過往兩地婚姻，大多是港男到內地娶妻後，申請太太來港定居。時移世易，粵、港男女彼此學歷拉近，加上香港樓價高企、內地創業機遇處處等，種種因素影響下，跨境婚姻夫妻定居內地愈來愈多，更不乏港男靠女方支持創業的真實例子。有本港婚姻中介人認為，隨着國家大力推動粵港澳大灣區發展，港人婚後定居內地或將成未來大趨勢，特區政府應關注在內地定居港人的處境，並提供適當支援。」文：方學明 圖：黃洋港
辭職北上「博一鋪」
40歲的趙文豪（人稱豪哥），三年前與拍拖多年、接近30歲的內地女子結婚，婚後他辭掉原本在港任職物流主管的高薪職位，儼如「入贅」般在深圳定居，還在當地創業，開設青年旅社，最近主力鑽研兩地租車App的開發工作。
「當初都心大心細㗎，正常嘅當然係幫老婆申請單程證，喺未出到單程證前，咪用探親證每90日不斷續期『定居』香港囉！話曬嫁雞隨雞，跟老公嚟香港住好正常吖！之不過，我老婆唔鍾意喺香港住，傾咗好耐之後，老婆放棄申請單程證來港，由我讓步，辭咗香港份工，一心一意喺深圳定居，同全力喺內地發展兼創業。」
憶述三年前這決定，豪哥以「博一鋪」來形容。當時他任物流主管職位，月薪數萬元，應付一個人的生活需要綽綽有餘；突然將工作辭掉，即變相失去個人最低安全保障。對於早已習慣安逸、且在職場打滾十多年的他而言，無疑是很大的冒險。但豪哥心想，若堅持妻子來港「定居」的話，面對的是只靠他一人的收入維持生計，在香港高樓價與高租金環境下，居住和生活質素一定不及內地優越。
「佢（妻子）本身喺深圳有工作，但一嚟到香港，就等於要失業，雖則我本身喺香港有地方住，但環境唔算好好，若要住得好，就要再搵地方，喺香港而家租樓閒閒地300呎都要過萬，我唔想大家住得咁擠迫，亦都唔想有種好似丟錢落海嘅感覺。」
發揮專業覓商機
目前豪哥所經營的青年旅社以每床位70至100元人民幣一晚計算，若旺季「爆滿」的話，一晚營業額可達四千元人民幣，平日與淡季也有千多元，雖說不上大生意，然而，作為每月穩定收入、創業起步，以及兩公婆獲得舒適生活環境計，他認為這是超值的。
當青年旅社營運上了軌道後，豪哥也開始其他方面的發展；最近，他展開了兩地租車App的開發工作。「我喺香港嘅專業係物流，而家搞青旅令我熟悉旅遊，所以諗有冇嘢係集旅遊同物流一身，既有融入又有利民意義。」
豪哥最終想出開發兩地租車App的方案。「我哋呢個App最與眾不同地方，除咗可以租跨境車用作載人穿梭兩地外，亦可以用作載貨，甚至不論香港或內地大灣區任何地方出租亦可。」他即場示範，例如客戶某年某月某日某時需要在大灣區一個地方需要專業攝影師的話，可透過App的「租人鍵」功能，租用所揀選攝影師的時間，同樣，客戶如需要將一批貨由香港運往國內，或由國內運到香港，亦可透過App的「租車只運貨鍵」功能，將貨物透過跨境車進行運輸。
反客為主闢新天
經過仔細思量，豪哥決定尊重妻子意願，變賣香港資產，義無反顧全力北上創業。「其實仲有一個原因驅使我『博』嘅，係我覺得內地未來嘅發展同機遇，一定比香港好同多。」豪哥稱，以他最熟悉的物流業發展為例，某程度若香港不將目前的模式轉變，基本上發展已經到達頂峰，之後就是汰弱留強階段，與其令自己每天擔驚受怕隨時被裁變失業，倒不如早早「豁出去」創業，另闢新天空。
豪哥以萬多元人民幣月租在深圳福田一個私人屋苑，一個接近二千平方呎的四房單位，並辦起青年旅社來。「搞青旅構思係我老婆諗出來，我哋兩公婆住一間房，之後一間係擺咗三張碌架床提供六個床位嘅男房，另一間係擺咗五張碌架床提供十個床位嘅女房，最後一間就係家庭房。」
豪哥坦言，若以深圳創辦青年旅社的模式套用在香港，會因為受種種條例所限制，肯定無法成事；相反，深圳在創業上卻較容易及具彈性得多。「香港淨係要過屋宇署同消防處再出牌，已經冇可能啦！即使畀你搞，以目前啲樓咁高嘅租金計，唔蝕死就奇。但係喺深圳，由於我老婆本身做開旅遊，熟悉內地辦青旅嘅條件同限制，結果租咗單位無耐，我哋馬上改裝，並申請牌照，結果好快出到牌，同埋好快已經同啲租房網站聯繫上。」
「本地薑」良心創業
「我為咗了解租車嘅收費模式，舊年仲特別內地香港兩邊走，喺香港做咗幾個月嘅Uber司機，揸一般車嘅話，一日開工12個鐘，淨收入只有600蚊左右，所以先諗與其將錢送畀外國公司賺，點解唔可以由我哋『本地薑』開發返啲App，香港人用返香港App，至少我哋有良心得多，唔會好似外國公司咁，剝削司機收入。」
目前，豪哥開發的兩地租車App仍在測試階段，未投入市場。他說：「搵贊助同投資者最難，不過我有信心，一定可以克服問題。」
面對粵港澳大灣區規劃即將出台，豪哥坦言，無可否認包括深圳、東莞，以至珠海、中山等處處機遇及創業機會多，他認為年輕或有志之士，趁機走到內地不同地區考察，多了解多參與，或能找到自己的一片天。
