圖：徐英偉在活動上分享被兒子「請食蕉」的經歷 大公報記者陳才逸攝
今日（9月18日）係香港手語日。手語難唔難學？勞工及福利局副局長徐英偉（Caspar）尋日出席一個相關活動時話，早排諗住教佢兩個仔「I L Y（我愛你縮寫）」嘅手語，希望兩個囝囝對住佢都多啲講「I LOVE YOU」。點知Caspar講完之後，估唔到佢兩個仔竟然做出多種生果嘅手語：「呢個係桃、呢個係提子、呢個係香蕉。」Caspar話太太聽完之後笑唔停，「我喺度教囝囝I LOVE YOU，佢請我食蕉」。
香港聾人福利促進會尋日舉行「第二屆香港手語日暨社政手語詞庫啟動禮」，聾福會就透露佢哋話嚟緊明年首季會推出「社政手語詞庫」，整合唔同範疇嘅時事及社會政策手語，睇嚟第時「一帶一路」、「粵港澳大灣區」等熱門政策詞彙，都有機會可以用手語表達出來，令聽障人士都可以明白呢類全城討論嘅話題。
