圖：鴿黨抽錯水！質疑李萃珍（右）不再署任同青嶼幹線大塞車事件有關
一項正常不過嘅官員署任嘅憲報，引起外界唔少揣測，話說政府尋日刊憲，署理運輸署署長李萃珍今日起停止署任，改由另一位運輸署副署長鄧偉亮繼續署任，反對派即刻以為「執到寶」，民主黨尹兆堅第一時間抽水出新聞稿，質疑同李萃珍日前就青嶼幹線雙向收費首日大塞車事件向公眾致歉有關。
不過，運輸署就解釋，前運輸署署長楊何蓓茵調職之前，署長嘅署任安排已經喺七月初獲當局批准，運輸署副署長（公共運輸事務及管理）李萃珍由7月15日至9月1日出任署理運輸署署長；運輸署副署長／策劃及技術服務鄧偉亮由9月2日出任署理運輸署署長，直至新署長上任。
有運輸署中人就向鄭晴講，呢項安排係一早定落，李萃珍只係由今日起放大假，而且佢早已經「升正」做副署長，唔存在「燉冬菇」，同塞車事件更加完全無關，希望大家唔好諗多咗！
