深水埗地標嘉頓中心納入歷史建築評級，或有助解除清拆危機。嘉頓公司之前向城規會申請，重建嘉頓中心，引起關注，因為好多街坊都唔捨得呢幢有80幾年歷史嘅鐘樓建築，有本地建築師翻查資料發現，嘉頓中心設計原來係出自大師手筆，1958年負責大樓改建嘅建築師，正是中國民初建築先驅朱彬。
古物古蹟辦事處尋日回覆區議會話，因為近日收到有公眾提出為嘉頓中心進行評級及相關歷史資料，經初步研究後，處方決定將嘉頓中心加入「須進行評級的新項目」名單，按一貫做法，會為項目進行深入文物價值研究，並由評審小組提出評級建議，之後交由古物諮詢委員會討論同通過評級。古蹟辦仲話，適當時會同業主傾「寓保育於發展」方案，即是政府有需要時就會出手「保」嘉頓中心。
