圖：巴斯光年同藝人鄧梓峰（右）係咪「撞樣」？ 迪士尼提供
「巴斯光年」歡送巴斯光年，呢個係香港迪士尼樂園尋日特備節目。園內「明日世界」嘅互動射擊歷險遊戲「巴斯光年星際歷險」，尋日喺300名「粉絲」陪伴及見證下完成最後一日任務，園方請來真人版巴斯光年、藝人鄧梓峰參加特別儀式，大家可以睇清楚佢哋係咪「撞樣」！台上有個着白恤衫嘅青年，原來係當年喺宣傳片出現嘅小小模特兒。
呢位陽光少年叫梁詩朗，時光飛逝12年，佢家陣喺科大讀三年級，收到話巴斯光年要「搬家」，拿拿臨返嚟幫手。
搬家同胡迪翠絲相聚
講返「巴斯光年星際歷險」，唔少香港人都已經玩過，簡單嚟講，就係「鬥射中目標拎高分」，遊戲由樂園2005年9月12日開幕就有，都係時候換一換。園方話，今日起大裝修，之後變身做超級英雄射擊遊戲設施，重開日未定。
咁巴斯光年搬去邊？今日起會重返「反斗奇兵大本營」，同好朋友胡迪、翠絲等喺返埋一齊，咁多「粉絲」，佢又點捨得走！
