圖：楊潤雄（左二）向雙老家庭送贈時令水果，並了解他們日常生活和需要
「兒時歡樂多，大人恨做細路哥。」就連教育局局長楊潤雄都唔例外！局長前日喺書展話想用「多啦A夢」法寶「時光機」重返大學時代，雖然略嫌太天馬行空，但尋日佢就成功「重返」中學時代，重遊油麻地，勾起唔少成長回憶。
楊潤雄尋日同一班青年義工到油麻地，探訪區內獨居長者及雙老家庭。事前佢仲好有心思咁揀咗個靚西瓜，畀班老人家消下暑。局長尋日三兩下手勢就同班老友記打成一片，仲有背後原因！其實局長以前喺油麻地讀中學同成長，投身政府後第一份工作亦係擔任油尖區助理政務專員，難怪佢話，「探訪區內長者，就好似返屋企同長輩談天說地，好有共鳴。」
今次「共慶回歸顯關懷」家訪，係慶祝香港特別行政區成立20周年活動之一。局長話，希望透過活動將香港社會愛心和關懷帶畀長者。青年人就透過親身接觸長者，可以了解社區歷史同埋未來需要。佢又保證，各司局長會繼續定期落區，同市民互動交流多啲，落力建立關愛共融嘅社會。
