高等法院本月中裁定羅冠聰、梁國雄、劉小麗、姚松炎四人喪失立法會議員資格,立法會主席梁君彥其後去信四人,要求佢哋喺兩星期內收拾議員辦事處嘅物品,將物資交還立法會。兩星期嘅限期即將屆滿喇,佢地執嘢執成點?鄭晴親自去睇過。
鄭晴尋日下晝先去九樓,見到羅冠聰嘅辦公室房門外,仍然貼住佢同DQ四人嘅海報,門外就多咗架四輪手推垃圾車,入面塞滿曬職員不時行出嚟掉嘅垃圾,睇嚟羅冠聰個office本身都真係有幾多垃圾!
同樣喺九樓嘅姚松炎辦公室,就已經無人執嘢,剩低一架手推車,車上放咗兩個大膠箱同一大袋嘢。據了解,呢啲雜物都係姚松炎嘅。雖然想話效率唔錯喇,不過姚教授咁樣擺架車喺原本已經幾窄嘅走廊,明顯係「阻街」喎。
鄭晴之後再去埋10樓劉小麗同梁國雄嘅辦公室外睇過,只係見到走廊無咩特別。聽講佢哋一早開始執包袱,所以已經執得七七八八,準備好同立法會講再見喇。