每屆立法會選舉嘅參選名單逐漸增加，選票愈出愈大張，令點票工作出現困難。政府建議簡化選票設計，例如刪減候選人照片或黨徽等內容，希望幫選票「瘦身」。立法會政制事務委員會尋日開會討論有關建議，唔少議員都認為，候選人嘅「嘜頭」同黨徽對選民係重要資訊，應該保留。
舊年嘅立法會選舉有兩個「何啟明」參選，一個係現任工聯會勞工界議員，另一個係落選「超區」嘅民協成員。民建聯劉國勳就話，如果兩個「何啟明」響下屆立法會選舉參選同一個選區，而選票上冇咗候選人嘅相片同黨徽，有可能會令市民投錯票，希望政府審慎考慮。
民建聯蔣麗芸就話，候選人唔單止會撞名，亦有可能會撞樣，好似黨友劉國勳同民主黨尹兆堅咁，兩個都「肥肥哋，圓碌碌咁」，佢希望政府響設計選票時，盡可能保留足夠資訊畀選民參考。
