圖：Ann姐希望政府考慮訓練流浪貓捉老鼠\大公報記者林少權攝
民建聯蔣麗芸（Ann姐）一向都好關注鼠患問題。尋日，佢就喺立法會度問政府會唔會考慮訓練流浪貓捉老鼠，同時解決鼠患同流浪動物問題，仲話美國而家已經有機構咁樣做，仲成為美國其中一個最有效嘅滅鼠方法。
唔少議員都對Ann姐嘅建議同局方一向嘅滅鼠辦法提出意見。新民黨主席葉劉淑儀就認為，滅鼠其實都係好專門嘅工作，需要有專業知識嘅專家，問局方如果無專家，會唔會問下「鼠王芬妹妹」（經民聯梁美芬），喺廣州帶啲嚟香港解決鼠患問題。
梁美芬希望區區有鼠王
梁美芬之後都有發言，佢話治鼠患係民生大事，佢亦因為治鼠患有花名，「唔緊要㗎，希望18區都有鼠王，區議員同立法會議員一齊跟進！」不過梁美芬就不滿政府嘅治鼠工作太陳舊，又話與其訓練貓，不如訓練人，做好政策先更加有效呀。
