圖：久戰沙場嘅白兵都豎起拇指，可見市民幾咁英勇/大公報記者林良堅攝
大件事啦！大件事啦！「紅十字會觀塘輸血服務中心」尋日畀帝國軍攻佔啦！
咦？唔係喎，點解班帝國軍白兵會幫捐血市民遞表，又同排隊捐血嘅市民合照嘅？無論大人定小朋友，都笑到見牙唔見眼咁，咩事呀？鄭晴捉住靚仔職員哥哥問咗幾句，先知原來係帝國軍501st軍團出動！
響應6．10世界捐血日
501st軍團又係乜東東？正式名稱係「帝國軍第伍零壹旅─維德之拳」，又稱為「501st軍團」，1997年喺美國成立，之後在我國內地、台灣等地都有申請成立地區部隊。香港部隊就由一班電影《星球大戰》嘅粉絲於2006年成立，佢哋除咗積極推廣《星球大戰》電影同有關產品，仲熱心參加同支持慈善活動，周不時扮演《星球大戰》嘅人物角色出席慈善活動。
咁啱今個月十號係世界衛生組織推動嘅「世界捐血日」，501st軍團決定提早出擊，尋日下晝殺到呢個捐血站同大家見面，仲話要同每個捐血助人嘅勇敢市民打氣同敬禮，Salute！
鄭晴
