小商戶可以喺假日墟市擺檔，本應係好事，但一啲聲稱係「基層」組織嘅團體前來搗亂，就真係令人憤怒啦！尋日，漁農界立法會議員何俊賢召開記者會，話天水圍天耀邨前日搞咗個假日墟市，畀一啲農夫、小商戶做生意，元朗農墟主席黃元弟話，農民一大早七點割好菜，諗住九點擺檔，希望得到大家認同，居民又可以喺上午買得開心。
但黃生又話，點知呢，有一個叫做「撐基層墟市聯盟」嘅組織喺中午嚟到拉橫額、叫口號，擾攘過程當中，大家互有衝突，最終搞到要由警方處理事件。
何俊賢批評，呢班示威者如果有咩不滿，應該用合法途徑表達，唔應該為一己政治私利，亂咁向小農戶發泄，令小農戶數月以來嘅農作物心血一朝喪，兼夾搞到居民掃興而回。呢班示威者嘅做法，係將民生議題升級至政治事件，為累積自己政治本錢，置農友及小商戶嘅生計於不顧。何俊賢認為，是可忍孰不可忍，一定要強烈譴責呢班人嘅惡行。
