圖：葛珮帆（左二）尋日探訪咗飛行服務隊，了解佢哋嘅工作情況
近年好多香港人都熱愛行山冒險，甚至鍾意獨自挑戰高難度山徑，無形中加重飛行服務隊工作量，舊年出動次數仲超過1400次。民建聯立法會議員葛珮帆（EQ）尋日就訪問咗幾位現役機師，揭開有型部隊神秘面紗。
唔講唔知，飛行服務隊現役機師有42人，包括五位女機師，EQ尋日搵咗其中三人亮相。唔好睇佢哋弱質纖纖，原來個個都受過嚴格訓練。女機師Emily話，入職時要先訓練14個月，視乎揸邊款機種，再訓練八至十年，先可以成為獨當一面嘅機長。
現役飛行服務隊機師Michael就趁機宣傳話，飛行服務隊仍然欠缺20幾位飛機師，嚟緊會透過選拔請多四至六人，呼籲如果鍾意揸飛機，又有心想救人嘅朋友，可以試下。 Michael話，考核雖然好嚴格，但希望年輕人唔好因為篩選程序而打退堂鼓，因為救人工作真係非常有意義㗎！
唔止EQ，鄭晴聽完之後都好佩服一班飛機師守護香港嘅精神。
