圖：高永文（中）昨與勇攀珠峰的吳俊霆（左二）和兩位攀爬至珠峰基地營的腎臟移植康復者黃炎華（右一）和陳國明（右二）

　　兩港人勇闖珠峰嘅喜訊，令大家非常鼓舞。同時另外兩名腎臟移植康復者亦成功克服咗身體障礙，登上珠峰基地營，為香港器官捐贈打下「強心針」。食物及衛生局局長高永文尋日同本港「成功登上珠峰第七人」吳俊霆、腎臟移植康復者陳國明和黃炎華會面，高局長讚揚三人敢於挑戰自我，喺大自然嚴苛環境下，仍可克服重重困難，精神可嘉。

　　原來，高局長都鍾意行山，2007年行過香格里拉茶馬古道，佢仲透露去到3500米時，覺得頭痛，要立即撤離，之後發現腦部有啲異常，需要做手術。

　　鄭晴聽聞，吳俊霆將會製成「珠峰夢——敢想人生」嘅影片，將勇攀珠峰嘅勵志故事，喺7月22日作慈善放映，全部收入將捐贈香港移植運動協會。高局長感謝佢哋嘅善舉，又呼籲大家繼續為器官捐贈活動努力，協助等緊器官移植嘅病人可以得到重生嘅機會。

　　而本港首位成功登頂珠峰女性曾燕紅，尋日再次回答「見死不救」嘅質疑，形容有關質疑就好似「責怪一個唔識游水嘅人，（點解）唔救一個遇溺嘅人」。佢話，途中知道有一個印度人跌落山谷，需要超過四個最TOP嘅雪巴人，用咗四日時間，先至能夠將印度人屍體搬落山，而四個雪巴人都面臨住五成嘅死亡風險。