圖：四眼惡客（穿背心者）推跌城巴職員，當場被捕 網上圖片
運輸業界的另類「網紅」就係一班惡乘客，自從《大公報》將巴士司機、站長平均每星期就有一個遇襲嘅慘況報道咗出嚟之後，多咗市民用手機將啲巴士霸座位，排隊打尖，搭霸王車等「騎呢」乘客、惡客拍低上載網絡平台外，警方都好重視巴士前線員工嘅人身安全。香港警務處交通總部喺報道出街當日，即刻致函汽車交通運輸業總工會，表明警方唔會容忍有關暴力行為，嚴厲執法之外，仲會將過去兩年有關車長或站長遇襲案件進行覆檢，檢視下每一單案件前線警員及調查人員嘅處理、檢控及判刑。交通總部還希望工會幫下手收集遇襲資料，方便警方跟進，又歡迎曾經遇襲嘅車長同站長自行向交通總部提供資料。
阿Sir咁醒神，汽總工會理事黎兆聰同鄭晴講都感到開心，前線同事唔使再怕被惡乘客打。佢又話，呢幾日警方做嘢又真係積極咗好多，同事遇襲報警，再無聽到警方勸雙方和解；前幾日深圳灣口岸嘅巴士站又有惡乘客唔排隊打尖上車，被城巴職員勸告，個惡客死唔服氣尾隨職員邊行邊鬧，唔夠兩句仲將職員推跌落地撞傷頭部入院，警員接報到場調查後即刻以涉嫌普通襲擊罪將惡客拘捕，繩之於法。
