大公網5月9日訊（記者龔學鳴）升唔到大學係咪會無前途呢? 好多香港人都係咁諗，但做人唔應該咁悲觀嘅。正所謂行行出狀元，保險界立法會議員陳健波尋日喺facebook發短片，話唔鍾意讀書嘅年輕人都好多出路，佢要介紹嘅就係中華煤氣工程學院。工程學院畢業生阿霖就話，佢係第一屆DSE考生，成績唔好，希望有一門手藝，所以選擇燃氣課程。雖然其他同學可能選擇讀副學士諗住駁入大學，但佢覺得一門手藝可以養妻活兒都唔錯呀。
氣體燃氣要讀三年，頭一年就要喺學校上堂。如果表現好，第二、三年就有機會到煤氣公司做學徒，最終通過考核，就可以註冊做一至八類氣體裝置技工，正式成為師傅，月薪都有萬二到萬五蚊架，同大學起薪點差唔多。中華煤氣工程學院高級訓練主任陳志偉就話，如果表現好，肯增值自己，有好大發展空間。好多管理層，例如工程師、工程監督，都係學院嘅畢業生。波哥仲話，除咗煤氣公司，都有好多機構提供同就業掛鈎嘅課程嘅。年輕人最緊要走有興趣嘅路，讀書唔讀書唔係重點。只要努力，行行出狀元。
