圖：筲箕灣慶祝一年一度民俗慶典「譚公誕」。盛大飄色巡遊隊伍為神祇譚公賀壽，小朋友扮演的濟公極受途人歡迎\大公報記者蔡文豪攝

　　又係一年一度譚公誕，長洲有飄色，筲箕灣都有賀誕巡遊，鄭晴就近近地嚟呢處趁下熱鬧。今年係香港回歸20周年，「2017年慶賀譚公寶誕巡遊」都係慶祝活動之一，吸引廿幾支隊伍參與，近萬人圍觀。有巡遊隊伍特登着住中華民族各種傳統服飾，寓意「民族團結慶回歸」，仲有小朋友扮成「小濟公」，祈願國家強盛，香港繁榮。

　　民族團結 共慶回歸

　　上午十點，中聯辦港島工作部部長吳仰偉、立法會議員張國鈞等人，幫牽頭嘅一條逾百呎嘅金龍點睛後，巡遊正式開始。呢次巡遊有慶祝回歸20周年嘅特殊意義，有隊伍就準備咗20頭醒獅助威。除咗舞龍醒獅，仲有八仙、觀音菩薩、仙劍娘娘一同出巡。當中有一支約30人嘅隊伍，身穿滿族、朝鮮族、蒙古族等服裝邊行邊舞，領隊就話，「呢樣裝扮表示民族團結，共慶回歸」。

　　巡遊隊伍經過筲箕灣電車總站，唔少搭電車嘅市民都在車廂中同表演者互動。之後巡遊至譚公廟祈福。祈福儀式由道教人士主持，非常傳統，祈求國泰民安、風調雨順，唔止街坊同市民嚟睇，有日本、歐洲友人都嚟趁熱鬧，同一班表演者合照。

　　金裝濟公 祝港繁榮

　　家住筲箕灣嘅曾小姐就話，「已經係第二年觀看表演，希望呢個代表香港嘅活動可以保持落去」，又話最鍾意嘅係啲扮成「濟公」嘅小朋友，大讚「幾得意」。其中一個「小濟公」Cathy，佢而家四歲，啱啱先同屋企人搬嚟筲箕灣，佢媽媽黃太話，「之前住得遠，冇機會嚟，依家有機會，就希望佢體驗下香港傳統嘅嘢」，媽媽仲講解「濟公」呢身裝扮嘅寓意，金黃色嘅衫，帽好似元寶咁樣，係希望香港經濟發展，繁榮富強。