麥美娟和她的愛犬麥棗（右）、麥糖（左）。
大公網4月12日訊 今個周末就係連續四日嘅復活節公眾假期，鄭晴上個星期同唔少立法會議員傾過，都有幾多人會跟立法會嘅考察團考察東江水，無咗兩日假！工聯會議員麥美娟(Alice)亦唔例外，不過佢決定剩返兩日假期留喺屋企休息，陪下兩位「愛女」。
Alice嘅兩位「愛女」，其實就係佢嘅愛犬麥棗同麥糖，兩隻狗仔都係迷你貴婦狗，大女麥棗今年五歲，細女麥糖今年四歲，Alice話佢地係兩位小公主嚟，因為兩隻愛犬都非一般地有性格，佢地喺屋企從來唔會搗亂，行路遇到障礙物會自己兜路行，細女去toilet更加唔鍾意有人望住，所以狗廁所亦都要擺得好隱蔽，連Alice嘅朋友都話佢地似人多過似狗！
Alice話兩位公主另一樣特點，就係佢地好「黐家」！佢地因為唔鍾意污糟，所以唔肯自己出街行，出街時要Alice抱住先得。平時佢地最鍾意就係跟Alice遊車河，又有得出街，又唔怕污糟，講到尾都係靠Alice呢位「靚媽」服侍周到。
